ඉංග්‍රීසි භාෂාවේ communication යන පදයෙන් "සන්නිවේදනය" යන පදය සිංහලයට එක් වී තිබේ."පොළොව මත ගෙවුණු දිගු ඉතිහාසය දිනක් ලෙස කල්පනා කළහොත් සන්නිවේදනය ඇති වූයේ ඊයේ මැදියම් රැයට නිමේෂයකට පෙරදීය" යනුවෙන් විල්බර් ශ්‍රාම් ප්‍රකාශ කරයි. ඒ අනූව සන්නිවේදනය යනු ක්‍රමානුකූලව වර්ධනය වූවක් බවට පෙන්වාදිය හැකිය.
සන්නිවේදනය යනු මානව සමාජයේ පැවැත්මට අත්‍යවශ්‍ය සාධකයකි. සමාජයක් යනු අන්තර් ක්‍රියාකාරකම්වලින් සමන්විත පුද්ගල කණ්ඩායමක එකතුවක් වන බැවින් එම ක්‍රියාකාරකම් යථාර්තයක් බවට පත් වීමට නම් සන්නිවේදනය අත්‍යාවශ්‍ය සාධකයකි. "ලෝකයේ ඉදිරි ගමන පවතින්නේ සන්නිවේදනය මතය" යනුවෙන් හැරල්ඩ් ඩි. ලැස්වෙල් විසින් කළ ප්‍රකාශය තුළින් ද එය මනාව පැහැදිලි වේ.
සන්නිවේදනයේ නිරත වන්නේ මානවයා පමණක් නොවේ. සත්ව සන්නිවේදනයක් ද පවතී. වෙනස වන්නේ අවශ්‍යතා සහ සංකීර්ණත්වයයි. එනම්, මානව සන්නිවේදනය යනු සංකීර්ණ ක්‍රියාදාමයකි. එහෙත් සත්ත්ව සන්නිවේදනය තුළ එවැනි සංකීර්ණත්වයක් දැකිය නොහැක. මිනිසාගේ ප්‍රධානතම සන්නිවෙදන මෙවලම වන භාෂාව සත්ත්ව භාෂාවට වඩා සංකීර්ණ වීම මීට ප්‍රධාන හේතුව වේ.
මේ අනූව පැහැදිලි වන්නේ සන්නිවේදනය යනු මූලික මිනිස් අවශ්‍යතාවයක්ය යන්නයි. ප්‍රාග් ඓතිහාසික යුගයේ සිට වර්තමානය දක්වාම මිනිසා විසින් ප්‍රධාන අවශ්‍යතා කොට ඇති මූලික මානව අවශ්‍යතා හා බැදි යෙදුම්කාරකයක් ලෙස සන්නිවේදනය හැදින්විය හැකිය. ඒ අනූව පැහැදිලි වන්නේ, මානසික සහ කායික අවශ්‍යතා පූර්ණ කරගැනීම සදහා මිනිසා විසින් උපයුක්ත සන්නිවේදනය ඔහු ජීවත්වන පරිසරයට අදාළව, සමස්ථ ලෝක පද්ධතියට අදාළව වෙනස් වන්නා වූ අවශ්‍යතාවක් බවට පත්ව ඇති බවයි.
No comments:
Post a Comment